Мерапрыемствы, прысвечаныя Міжнароднаму дню роднай мовы, арганізаваныя на гэтым тыдні ў МДУ імя А.А.Куляшова

Мерапрыемствы, прысвечаныя Міжнароднаму дню роднай мовы, арганізаваныя на гэтым тыдні ў МДУ імя А. А. Куляшова. На факультэце замежных моў ужо прайшлі алімпіяда па беларускай мове і конкурс чытальнікаў вершаў.

Асабліва вялікую ўвагу выклікаў да сябе конкурс чытальнікаў, у якім вырашылі паўдзельнічаць не толькі беларускія студэнты, але і грамадзяне Туркменістана. Як пажартавала намеснік дэкана факультэта Алеся Валер’еўна Доўгаль, колькасць замежных аматараў паэтычнага беларускага слова (Даўлет Гелдзімырадаў) сярод удзельнікаў конкурсу (усяго 11) складае прыблізна 10%. «Студэнты падтрымалі нашы захады па папулярызацыі беларускай мовы. І гэта ўсцешвае, бо без мовы, без гісторыі, без нацыянальнай культуры немагчымае развіццё грамадства. Добра тое, што моладзь гэта разумее», — распавяла Алеся Валерь’еўна. Студэнты сапраўды падышлі да чытання вершаў творча і нават крэатыўна. Журы звяртала ўвагу на чысціню маўлення, эмацыянальнасць, выразнасць, здольнасць чытальніка перадаць думку аўтара пры дапамозе голасу і жэстаў. Цікава тое, што выбар мастацкіх твораў быў дастаткова разнастайным — ад класікаў (Я. Колас, Я. Купала, М. Багдановіч) да нашых сучаснікаў (Рыгор Барадулін, Андрэй Хадановіч). Застанецца ў памяці выступленне Даўлета Гелдзімырадава, які на цудоўнай беларускай мове прачытаў верш Максіма Багдановіча «Зорка Венера».  «Гэты верш мне надзвычай спадабаўся яшчэ падчас навучання на першым курсе, — тлумачыць свой выбар Даўлет. — Я адчуў моцнае каханне паэта да дзяўчыны, роспач і боль іх развітання. Гэта адзін з самых эмацыянальных вершаў у класічнай літаратуры». «Лічу, што агульны ўзровень чытальнікаў дастаткова высокі, — адзначае Алеся Валер’еўна Доўгаль. — Вынікі конкурсу мы плануем падвесці 22 лютага падчас святочнай імпрэзы „Пра нашу мову і нашу краіну“. Мяркую, што журы будзе нялёгка выбраць пераможцу».

Марыя Юрчанка

{phocagallery view=category|categoryid=59|limitstart=0|limitcount=0|detail=5}